Nuvena a san Vastianu

da recitarsi nei giorni della novena al santo. oppure durante l’anno se si vogliono chiedere grazie particolari. il testo probabilmente è stato importato. la signora che lo custodiva in forma scritta non sa fornire maggiori informazioni a riguardo. tuttavia, essendo vario il metro e la composizione, credo si possa parlare di testo rielaborato da un possibile originale culto

ATTACCU

” e cu chiù beni ci vo chiù forti u chiama  evviva San Vastianu! beddu biunnu e rizzareddu VIVA SAN VASTIANEDDU! cu avi cori ‘nto pettu senta stu gran cuntu du martiri san Vastianu c’ora e sempri n’ajutu chiamamu!”

e cu a S. Vastianu ci porta affettu
ci la dicissi cu gran rispettu
a Santa Litania
cu San Giuseppi e cu Maria
San Vastianu beddu e santu
vi priamu senza sdirrubbu e scantu
di dari cunsulazioni
ad ogni nostra afflizioni

PRIMU JORNU

San Vastianu u gran santu
si ni ava pu munnu
supra un cavaddu sciancu  e iucunnu
senza firi  e senza scantu

amicu era du ‘mpiraturi
ca ci purtava rispettu e amuri
beddu era e rizzareddu
avia cavaddu, spata e aneddu

San Vastianu era paanu
Ma u Signuri ci misi a manu
e accussi cumparennu
c’alluminau u sennu

San Vastianu  a firi si vota
‘ncielu si pistia e si fa a rota
si fa festa p’un Santu
c’avi a fari ancora tantu

oh ingratu piccaturi
chianci chianci u to duluri
san vastianu è cunvirtutu
e tu ancora un t’ha pintutu

O gluriusu prutitturi chista razia n’ati a fari, l’arma nostra arridduciti e a Diu a ‘ndrizzati!

PATER E GLORIA.

SECUNNU JORNU

du picciotti cunvirititi
o palazzu su ‘nchiuduti
p’Amuri du Signuri
su mazziati a tutti l’uri

San Vastianu binidittu
eni druocu fittu fittu
e cu granni divuzioni
ci va dannu cunsulazioni

un ci puonnu i parienti
mancu puri i turmenti
i paroli i San Vastianu
dannu curaggiu a manu a manu

Iddu cu granni e santu firvuri
va cuntannu a tutti l’uri
l’Evangeliu du Signuri
e cunverti ‘nviritati
tutti i genti da citati

e tu ‘ngratu chi sta facennu?
u signuri tu sta scurdannu!
chiossai tinni alluntani via
chiossai è u piccatu a to mircanzia

oh san Vastianu Prutitturi
a tia purtamu onuri
pigghia tu u sensu fallaci
e cu Signuri mettini a paci

Terzu Jornu

vinni u tempu da svilata
fui tra turmenti na nuttata
mentri e du picciuttedda
cunsulava cu parola bedda!

Nastrumenti ca parrava
comu n’anciulu s’addumava
e fu vistu ‘nviritati
di putenti da citati

chista luci ammacilanti
livava peni e patimenti
a mugghieri di l’artu prilatu
ca curiusitusa c’era o latu

Vitti addumari sa gran sorti di sciamma
e pi truvari u vattiu subitu s’accanna
si cunvirteru e a beddu cori
puri i parienti di du martori

e vastianu ‘nviritati
va taliannu cu umiltati
e tu piccaturi
d’ogni cosa ti fa onuri

e un pensi mancu un mumentu
ca ti veni du Sacramentu
oh San Vastianu prutitturi
datini ajutu ‘nta sti uri!
datini bonu e grannu firvuri e ubbidienza a Nostru Signuri

Quartu Jornu

una sciamma assai putenti
comu è granni e stralucenti
arristari certu un putia
ammucciata menzu a via!

quannu u tintu mpiraturi
u senti diri iddu puri
lestu lestu fa chiamari
a Vastianu p’arrisittari

unn’è daveru è farfantaria
chiddu ca sinteru aricchi mia?
arrispunni ddu gran Santu
Cristu è miu onuri e vantu!

e si chistu vulia sapiri
sugnu prontu puri a muriri!
U mperaturi si ncifaria
chista offisa è fatta a mia!

siddi tu ti vo sarvari
u ma cumannu ha ascutari
te cà ncenzu e ncizeri
e ma statui vasaci i peri!

e tu ngratu a Diu l’abbannuni
siddi ti scanti u metti all’agnuni
ognu ura e ogni mumentu
u ietti a patimentu!

o San Vastianu prutitturi, siti servu di Nostru Signuri, datini forza e vuluntà d’essiri santi pi l’eternità!

QUINTU IORNU

quannu senti stu parrari
cu paroli assai amari
quasi comu disfiziatu
c’arrispunni u Santu amatu:

e vuatri cu vi sintiti
lestu forza arrispunniti!
contra u Signuri un vi mittiti
iddu è Diu e vuatri pirditi!

portu fidi e assai onuri
sulamenti o ma Signuri!
ncenzu, cannili e ogghiu santu
ci li dugnu senza chiantu

veramenti a bonu visu
picchi sacciu mparadisu
Iddu a mia  aspittannu stà
e chiù bona festa mi farà

ma chiossai sciamma s’adduma
o mperaturi c’acchiana a scuma!
e cu vuci di trimari
dici “itilu ammazzari!”

e tu ca divotu ti va dicennu
o Signuri u va scanuscennu,
e siddi a vita t’hai a sarvari
si prontu puri a rinniari!

San Vastianu santu mpurtanti, datini curaggiu e livatini du scanti, e siddi a prova avi a viniri datini forza nzinu no patiri!

SESTU IORNU

i surdati u pigghiaru
tuttu nuru u spugghiaru
non iardinu su purtaru
e a n’arvulu l’attaccaru

e diri ca fuoru so cumpagnia
quannu eranu a uerra e a strania!
e ora ca sunnu cumannati
nuddu a Vastianu ci sta o lati!

oh comu è attaccatu senza cura
Pari n’agnidduzzu a criatura!
un surdatu scilliratu ci vo diri
ti sarvamu si lassi u Signuri!

U Signuri è miu pasturi
pi Iddu supportu u duluri
un ci puonnu no i turmenti
ia ci offru ogni patimenti!

e poicchi ancora un lu sintiti
cu assai zelu vu ripiiti
sugnu tuttu du Signuri ardenti
un lu rinneu a Diu Onniputenti

compatiti ora cristiani
quanta forza San Vastiani!
e nuatri scanuscenti
semu sempri ne lamenti

oh san Vastianu Prutitturi, vui priati a tutti l’uri, priati pi nuatri ca siemu piccaturi e datini aiutu na tutti i duluri

SETTIMU IORNU

a sti paroli di San Vastianu
ognunu pigghia l’arcu e manu
e pruntannusi a tirari
misiru a tenniri e a isari!

u capitanu ca ancora un ci cridia
pigghia parola e dici arria
Lassa iri sa firi chi v’assicutannu
e ia a casa liberu ti mannu!

San Vastianu a Diu ubbidienti
isa l’occhi e un dici nenti
talia tutti ddi surdati
e prea sianu pirdunati

a un signali cunvinutu
contra a chiddu senza scutu
chiovinu i frizzi a celu chinu
faciennulu comu un rizzu marinu!

cari Vastianu suttu u peri d’aranci
tuttu chinu di frizzi e di lanci!
ma u Signuri ch’è unniputenti
un lu fa moriri viramenti!

e tu divotu c’ascuti stu cuntari
si sempri prontu a vuci ittari
e siddi ti doli tanticchia occhi cosa
subitu vulissi calata la rosa!

oh San Vastianu da tutti i mali, oj e sempri n’aviti a taliari e siddi u dimoniu u peri n’arresta cu na frizza nfrizzatici a testa!

OTTAVU IORNU

nterra è ittatu SanVastianu
quannu na viduva cu fari cristianu
veni a pigghia stu corpu nfrizzatu
picchi sia cu firi vurricatu

ma chi surprisa e chi alligria
quannu capivi ca Vastianu un muria!
chi grannu giubilu e chi orazioni
subitu subitu li curi disponi

e cu pacenzia e santa manu
metti arria additta San Vastianu!
u miricau cu i megghiu curi
ispirata com’era di Nostru Signuri!

quannu l’amici e i canuscenti
seppiru di su santu rinmiscimenti
lestu ci misiru a cumannari
di ca tu ora ti n’ha scappari!

San Vastianu cu fidi arrispunnia
miu vantu è moriri pu Signuri mia
a nudda banna minni vogghiu iri
pu ma Signuri haiu a muriri

e nuatri chi siemu nguranti piccatura
offinnemu u Signuri a ogni ura!
e siddi i cosi vannu o pinninu
iamu sgrisciannu u misteru divinu!

O San Vastianu chinu i virtù, na stu munnu aiutani tu e fanni accapiri cu gran prividenza ca siemu ne mani da divina Pruvvidenza

 

NONU IORNU

na na iurnata di festa mpurtanti
senza timuri e senza scanti
ivi Vastianu a tistimuniari
a firi n Cristu ca u vosi sarvari

mentri pi strata passa u mperaturi
sata no mienzu facennu rumuri
oh chi scantu vuatri pinsati
quannu su vitti nnazi isati

u mpiraturi accarpia e si cunfunni
comi vinni, picchi? di dunni?
unn’era muortu su fatta e surdatu?
comi facia a stari nto chiacatu?

san Vastianu culonna u Signuri
cussi parra facennussi onuri
tu ca si tintu vulia astutari na sciamma
ca u Signuri Diu ardiu e cumanna

mpiraturi tu si nenti e  pruvulazzu
puru ca sta dintra sa ran sorti i palazzu
siddi u to cori un lu canci pi Diu
o nfiernu abbrusciatu ti viu!

ma essennu chiddu di tintaria curunatu
dici ca sia arria ammazzatu
cu decimila fracculiati e centu vastuniati
San Vastianu è cunnannati!

ma no cielu e mparadisu si fistia
Pi st’arma granni ca torna narria
l’ancili tutti, i santi e i virgineddi
cantanu i lodi e i sarmudii chiù beddi

quannu Vastianu agghiunci o celu
u Paradisu è un fistinu daveru
e supra a terra d’ogni cristianu
si leva a prighiera a San Vastianu!

 

Lascia un commento

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione / Modifica )

Foto Twitter

Stai commentando usando il tuo account Twitter. Chiudi sessione / Modifica )

Foto di Facebook

Stai commentando usando il tuo account Facebook. Chiudi sessione / Modifica )

Google+ photo

Stai commentando usando il tuo account Google+. Chiudi sessione / Modifica )

Connessione a %s...

%d blogger cliccano Mi Piace per questo: