Ninnaredda a Gesuzzu Bambinu

Maria Virgini annacannu

a Gesuzzu figghiu so,

Ci dicia cussi cantannu:

Dormi figghiu e fa la vò

Bedda rosa e biancu gigghiu

Fa la vò Gesuzzu figghiu,

chi su beddi sti gutiddi

ch’è amurusa sta vuccuzza

chi su biunni sti capiddi

quantu è bedda sta facciuzza

lu me cori pi tia spinna

fa la vò sienti la ninna

Figghiu beddu picciriddu

Di stu cori ardenti sciamma

Veramente senti friddu

veni abbrazzati a la mamma

ia ti scardu a lu me pettu

Fa la vò figghiu dilettu

Quantu t’appiriu a purtari

di riali li pasturi

Tutti a tia li vogghiu dari

Cu cchiu affetti e cu cchiu amuri

Dormi dunca dormi tu

Fa l’avò figghiu Gesù

Tu pri amuri t’hai ncarnatu

di li pazzi piccaturi

quantu t’hannu disprizzatu

Mancu chianci l’erruri

Iddi scialanu e tu pati

Chi su ingrati chi su ngrati

Ma figghiuzzu nun è nenti

Si nun chianci l’omu ngratu

La matruzza sulamenti

Cumpatisci lu to statu

Ia pi l’autri chiancerò

Fa la ninna e fa la vò

figghiu caru e nicareddu

ora dormi senza affannu

picchi appressu o figghiu beddu

li to peni assai sarannu

si patiri divi tantu

fa la vò figghiuzzu santu

chi turmentu ohimè! chi guai

sintirò chi gran martiri

quannu un jornu mi dirai

matri mia, viu a muriri

oh memorii assai dulenti

fa la vò figghiu nnuccenti

da l’amici toi chiù cari

sarai figghiu abbannunatu

e vinnutu pri dinari

da un apostulu tuo ngratu

ah! figghiuzzu comu a fari?

fa la vò, un ci pinsari!

figghiu beddu, figghiu amatu

tanti e tanti battituri

ntra la casa si Pilatu

ti darannu i piccaturi

ia li provu ntra stu pettu

fa la vò figghiu dilettu

figghiu caru e graziusu

re pacificu e climenti

lu to capu gluriusu

pruvirò spini puncenti

chi diadema dulurusu

fa la  vò figghiu piatusu!

oh chi affanni o chi dulura!

mani e pedi toi sagrati

poi sarannu in cruci dura

da tri chiova trapassati!

oh! chi anguscia sintirò!

fa la vò fammi la vò!

Picchi chianci o figghiu duci?

Via dicillu a la matratuzza

Fammi sentiri sta vuci

Fa parrari sta vuccuzza

Pirchi fai lu cucchiareddu?

fa la vo figghiuzzu beddu

a mia lassa lacrimari

chi a la cruci aiu a vidiri

a tia figghiu agunizzari

e da reu dipoi muriri!

a pinsarci mi accoru

fa la vò figghiuzzu d’oru!

di poi mortu! oh casu riu!

vinirà lu to custatu

ccu duluri e affannu miu

d’una lancia trapassatu

fammi pri ora un sunniceddu

fa la vò figghiuzzu beddu

o figghiuzzu amatu tantu

chi pri tia stu cori spinna

pri astutari lu me chiantu

chiudi l’occhi a la mia ninna

stu miu chiantu è troppu amaru

fa la vò figghiuzzu caru

Via viniti ancili santi

Sinfunii beddi faciti

cu li vostri duci canti

a Gesuzzu addurmisciti

E tu sonnu veni veni

Fa la vò Gesuzzu miu beni.

Sinni vinni già  lu sonnu

Doppu tantu lagrimari

Li so ucchiuzzi chiù nun ponnu

S’accumincia appirnicari

Già lu figghiu è addurmintatu

Oh! miu Diu figghiuzzu amatu

Già ti viu ora durmiri

Viu chiust’occhi duci

Chi un  iornu haiu a vidiri

Chiusi st’occhi ntra na cruci

Dormi tu ca pi mia frattantu

L’occhi abbunnanu di Chiantu

bambineddu nzuccaratu

veru figghiu di Maria

ia t’aduru umiliatu

comu Diu veru missia!

Viva Sempri Gesù Beddu

Diu fatt’omu Bambineddu!

Lascia un commento

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione / Modifica )

Foto Twitter

Stai commentando usando il tuo account Twitter. Chiudi sessione / Modifica )

Foto di Facebook

Stai commentando usando il tuo account Facebook. Chiudi sessione / Modifica )

Google+ photo

Stai commentando usando il tuo account Google+. Chiudi sessione / Modifica )

Connessione a %s...

%d blogger cliccano Mi Piace per questo: