Pubblicato da: cuccoangelo | 14 agosto 2011

A SANTA LITANIA

A bedda Matri supra n’artari na rosa ivi a pusari cu gran sulennità

chi bedda curuna ca purtati ntesta si fa na granni festa pi tutta la città

chi bedda facciuzza è luci risplinnenti Maria matri Putenti ni cunsulirà

chi beddi capiddi su tanti fila d’oru amuri e ristoru pi cu la chiamirà

chi beddi ucchiuzzi su specchi i paradisu chiù gioia e chiù risu Maria ni darà

chi bedda vuccuzza parissi china i meli all’ancilu Rabrieli certu rispunnirà

chi beddi pumidda su du cirasi russi  cu mpericulu fussi certu lu sarvirà

chi bedda sta vesta ch’è d’oru arraccamata siti patruna e avvucata pi tutta umanità

chi bedda cintula  è tutta sita e rasu a duni a santu Masu e iddu cridirà

chi bedda scarpina aviti misa o peri c’è l’ancilu Rabrieli chi vi la guardirà

chi peri dilicatu c’aviti cara Matri u dimoniu ci scacciati e ni libirirà

chi beddu stu mantu c’hè granni quantu u mari ni ci ati a riparari matri da carità

chi beddi sti pedini su tutti argentu  pi ogni mumentu Maria ni uaridirà

chi beddu anidduzzu c’aviti misu a manu  u Diu patri e Suvranu dunari vi lu vò

è quinnici d’austu a rosa spampinavu maria ncelu acchianavu pi una eternità

che bedda trapassioni o ancili du celu  spincitici su velu ca acchianirà

e di l’eternu patri sta granni e summa matri curuna n’avrà

e dudici stiddi s’addumaru tuornu a testa si sistimaru

dintra u sipurcru nasciunu rosi e gigghia pi na cussi granni figghia

ca ncelu acchianò.

l’ancilu Micheli ci porta a menza luna, Raffieli ci porta na rosa
Maria u peri ncelu posa e gran festa si farà

(Dalla voce della Signorina Giuseppa B.)

CRUNEDDA DA MATRI SCIUSA (ASSUNTA)
quattru gigghia centu rosi
gesù cristu accussi vosi
corpu e carni a Matri Maria
mparadisu acchianata sia
cu stu rusariu u voli ntunari
a Bedda Matri l’avi a fari
cu du rusariu ni voli profittu
u dicissi comi fu scrittu
cu voli grazii e boni li spia
ci lu dicissi a Matri Maria

MISTERO:
a quinnici d’austu u vosi u Patri Eternu
u triunfu di Maria supra u nfernu
Corpu e arma senza macula criata
sinn’acchiana a bedda matri Mmaculata

GRANO piccolo:
no sepurcru di petra dura
nasciunu gigghia e nasciunu ciura
oh Gran Signura pi la vostra acchianata
na grazia a nuatri ni sia data

MISTERO:
pi guardari a bedda Matri no transitu ca fa
ogni ancilu du cielu u Signuri u manna cà
e l’apostuli e li santi cu affettu e firi pia
finu a quannu s’addurmisci a Gran Virgini Maria

U CUNTU D’ACCHIANATA

Diu VI SARVI O BEDDA MATRI

NO IORNU CA ACCHIANI ALL’ETTERNU PATRI

STA CANTUNARA VULIEMU ISARI

A VUATRI CA SITI STIDDA DU MARI

SCIURIU L’ALANNIRU E  A ROSA MARINA

QUANNU NASCIU LA MATRI BAMBINA

SANT’ANNA A VITTI ACCUSSI NICAREDDA

DICI  “CH’è BEDDA MARIA BAMBINEDDA!”
SCIURIERU SE ROSI E TRI GIGGHIA
QUANNU Sant’Anna o tempiu porta so figghia
(…)

SCURIU A VITI E SCIURIU ALIVI
QUANNU DU CIELU L’ANCILU SCINNIVI
DU GRAN PATRI PORTA L’AMMASCIATA
E MARIA è MATRI NNUNZIATA

SCIURIU NTERRA UN SCIURI CHIù BEDDU
QUANNU I MARIA NASCIU U BAMBINEDU
E SAN GIUSEPPI VIDIENNULU DICIA
CHI BEDDU SCIURI EPPI DI DIA

SCIURIRU PRUNI E SANTI SPINI
QUANNU SI SPERSI GESUZZU BAMMNINI
E MENTRI UN LU PUTIANU ATTRUVARI
MENZU E DUTTURA SI MISI A NSIGNARI

SCIURIU DA MARVA U SCIURI
QUANNU MARIA SI SPARTIVU DU SIGNURI
QUANNU GESù SINNI IVI A STRANIA
DUNA ACCURA CI DISSI MARIA

SCIURIU A INESTRA E U SCIURI DUCI
QUANNU MARIA è SUTTA A CRUCI
E VIDENNU GESUZZU ALL’AGUNIA
A GRAN SIGNURA NGUSCIANNU CHIANCIA

SCIURIRU SCIURA DI OGNI GUALITà
QUANNU U RESUSCITU NCONTRA A SO Mà
E VIDENNUSILLU SPUNTARI A CASA
SI L’ABBRAZZA, STRINCI E VASA

DECI ROSI SUPRA N’ARTAREDDU
METTI A JUCARI GESù BAMBINEDDU
CINCU DA PETRI NI FA CANCIARI
E A BEDDA MATRI VOSI CHIAMARI

QUATTRU GANCILI VOSIRU CALARI
PA VIRGINI MARIA VENIRI A PIGGHIARI
L’ANCILU CUSTODI è U PRIMU A VULARI
PICCHI A MARIA CI VOLI PARRARI

MA QUANNU è IUNTU NA MATRI MARIA
IDDA CI DICI “ ANCILU DI DIA”
QUANNU DU CIELU SCINNITI CU LENA
VO DIRI CA C’è O PRIU O ASSAI PENA

L’ANCILU SANTU CI ARRISPUNNIA
“ è URA D’ACCHIANARI MATRI MARIA!
TRI IORNA ANCORA RIGINA E MATRI
E PUA S’ACCHIANA O SUMMU PATRI

A GRAN SIGNURA PARRA E DICI
“U SUMMU PATRI MI FAZZA FILICI
PRIMA CA SCURA A VITA  MIA
TUTTI L’APOSTULI VOGGHIU VIDIRI ARRIA!”

“NZOCCU TU SPII TI SIA ACCURDATU
U SUMMU PATRI N’è PRIATU
DI DUNNU SUNNU OVUNCA ARRIVATI
CU GRAN MIRACULU SARANNU VULATI!”

QUANNU AGGHIURNAVU A SECUNNA IURNATA
DI L’APOSTULI MARIA è CURUNATA
SAN PITRUZZU E PIIRI O LIETTU
CI PARRAVA CU ASSAI RISPIETTU

CARA MATRI ERA A ROMA CA A MISSA PRIDICAVA
SACCIU NZOCCHI M’AMMATTIA E IA Cà M’ARRITRUVAVA
ARRISPUNNI SANTU NIRIA CU AFFETTU PIU
FUI PURTATU Cà PI VULUNTà DI DIU

ARRISPUNNI SAN PAOULU VERAMENTI ALLUMINATU
ERA DDA CU SANTU PIETRU E Cà FUI NVULATU
SAN GIUVANNI CA ERA PRISENTI
SI SURPRINNIA VERAMENTI

U TERZU IORNU CU AFFETTU E FARI PIU
I BINIDISSI A TUTTI E PUA S’ADDURMISCIU
COMI SI CHIURUNU DDI UCCHIUZZI BIATI
COMI S’ASTUTA DDU SANTU SUMMU SCIATI!

MA FESTA CHIù GRANNI SI FACIA
QUANNU ARMA E CORPU ACCHIANAVA MARIA
DINTRA U SEPURCRU DI PETRA DURA
NO CHIù MARIA MA  SCIURISCIUNU I SCIURA

ROSI E GIGGHIA CU BEDDA ALLIGRIA
DUNANU GLORIA O NOMI I MARIA
SULU SAN MASU UNN’ERA PRISENTI
CRIDIRI UN PUTIA A STU GRAN PURTENTI

A GRAN SIGNURA ESSENNU MATRI DUCI
A STU SO FIGGHIU U VO LIVARI DA CRUCI
E CU GRANNI E BEDDA MAISTUSITA’
NO CIELU VIDIRI A MATRI SI FA

E CHIAMANNU SANTU MASU CU BEDDA VUCI
CHIOSSAI HA CRIDIRI FIGGHIU MIU DUCI
E PI FARI CA CRIDIRI CHIOSSAI PURRIA
PIGGHIA STA CINTULA CA TI DUGNU IA

QUANNU SPEDDI STA CANTURA MIA
SIANU MISI I ROSI N’AVUTARU I MARIA

 


Lascia un commento

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione / Modifica )

Foto Twitter

Stai commentando usando il tuo account Twitter. Chiudi sessione / Modifica )

Foto di Facebook

Stai commentando usando il tuo account Facebook. Chiudi sessione / Modifica )

Google+ photo

Stai commentando usando il tuo account Google+. Chiudi sessione / Modifica )

Connessione a %s...

Categorie

%d blogger cliccano Mi Piace per questo: